Түүнийг Салем гэдэг. Долоон настай. Тураалд орж, хатангиршчихсан. Харамсалтай нь, тэр ганцаараа ийм биш. Түүн шиг үхлийн ирмэгт ирээд буй 350 мянга гаруй хүүхэд Йеменд бий.

Дээрх видео сошиал сүлжээгээр цацагдсанаас хойш нэг жилийн хугацаа өнгөрөхөд Салем шиг хүнд байдалд байгаа хүүхдийн тоо хоёр саяд хүрч, нэмэгджээ.

Салем харин энэ хугацаанд олон улсын хүмүүнлэгийн байгууллагынхны тусламжтайгаар үхлийн аюулыг гэтэлж чадсан байна. Эцэж туран, сульдаж, нүд халтирам болсон байсан хүү одоо жин нэмж, бие нь сайжирчээ. Гэхдээ хүү тархины гэмтэлтэй тул өсөлт нь бүрэн зогссон. Түүний гэр бүл хоол ундны гачигдалтай хэвээр.

Иргэний дайны хөлд нэрвэгдсэн йеменчүүдийн амьдрал өдрөөс өдөрт хүндэрсээр байна. 28 сая хүн амтай тус улсын ард иргэдийн талаас их хувь нь хоол хүнсний дутагдалд орсон гэж НҮБ-аас мэдэгдсэн. Эмнэлгийн хүүхдийн тасаг ачааллаа дийлэхгүй, үүдний хонгил, хүлээлгийн өрөөгөөр дүүрэн тураалд орсон хүүхдүүд үхэлтэй тэмцсээр байгаа ажээ.