Таван настай хүүхдийнхээ дансанд 500 сая төгрөгтэй шүүгч хэн бэ


УИХ-ын гишүүн Х.Нямбаатар “Цензургүй яриа” нэвтрүүлэгт оролцох үеэрээ ийн хэлсэн юм. Нэвтрүүлгийн үеэр гишүүн Х.Нямбаатар “Эрдэнэт”-ийн 51 хувийг Өмнөд Африкийн Стандарт банкинд барьцаалсан “Жаст”-ын Ш.Батхүүгийн асуудал, 49 хувийн хувьчлалын тухай ярихдаа нэгэн ноцтой баримт ярьсан нь энэ. Тодруулбал “Таван настай хүүхдийнхээ дансанд 500 сая төгрөг, өөрийнхөө дансанд нэг сая ам.доллартай шүүгч бий. Намайг ингэж хэллээ гээд Шүүхийн ерөнхий зөвлөлөөс мэдэгдэл гаргах байх. Бүр захиргааны хэргийн шүүхээр хүн гүтгэсэн гэж хэрэг үүсгэж болно. Тэглээ гээд би зогсохгүй. Цаг нь болохоор Авлигатай тэмцэх газарт шалгагдаж байсан энэ асуудлыг баримттай нь ил болгоно. “Эрдэнэт”-ийн 51 болон 49 хувийн асуудлыг сөхөөд ирэхээр энэ бацааныг дарна гэж хууль хяналтын байгууллагынхан ярьж эхэлсэн байна лээ” хэмээсэн юм. Мөн тэрээр “Захиргааны хэргийн шүүхийн шүүгч нар хөрөнгөжсөн. Анхан шатны шүүх дээр 50 мянган ам.доллар, давж заалдах шатны шүүх дээр 100 мянган ам.доллар, хяналтын шатны шүүх дээр 200 мянган ам.доллар авлига авдаг яриа явчихлаа” гэсэн юм. Түүнчлэн Тагнуулын ерөнхий газрын дарга асан Б.Хурцтай холбоотой хэд хэдэн баримт байгаа ч энэ удаад тэрээр дэлгэхийг хүссэнгүй.Тагнуулын экс дарга Б.Хурцыг БНСУ-д Элчин сайдаар томилох асуудлыг ярьж эхлэхэд УИХ-ын нэр бүхий 21 гишүүн нээлттэй сонсгол явуулах албан хүсэлтийг УИХ-ын даргад өргөн барьсан байдаг. Тэдний нэг нь УИХ-ын гишүүн Х.Нямбаатар. Гэвч 21 гишүүний хүсэлтийг хүлээж аваагүйтэй холбоотойгоор Ж.Батзандан нарын таван гишүүн чуулганы нэгдсэн хуралдаантай зэрэгцүүлж нээлттэй сонсголыг зохион байгуулж байв. Харин тагнуулын экс даргын нэр хүндэд халдсан хэмээн шүүхээс үзэж уучлал гуйхаар болсон Ж.Батзандан гишүүн “Б.Хурцын гар хөл болж ажилладаг таван прокурор, дөрвөн шүүгч, 10 мөрдөн байцаагч байна. Мөн татварын байцаагч, аудитын ажилтнууд ч байна. Бид удахгүй тэднийг зарлана” хэмээн мэдэгдэж байсан юм. Харин энэ удаад УИХ-ын гишүүн Х.Нямбаатар гишүүний хэлсэнтэй холбогдуулж таван настай хүүхдийнхээ дансанд 500 сая төгрөгтэй шүүгч хэн бэ гэсэн асуулт энэ өдрүүдэд хөврөх нь.

access_time 2018-03-13 13:30

Холбоотой мэдээ

АНХААРУУЛГА: Уншигчдын бичсэн сэтгэгдэлд mgltimes.com хариуцлага хүлээхгүй болно. mgltimes.mn сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Хаяг : Улаанбаатар хот, Чингэлтэй дүүрэг 3-р хороо Peace tower 17 давхарт 1704 тоот
И-мэйл : MGLTimes976@gmail.com
Утас : +976 7500-8811
Ⓒ Бүх эрх хуулиар хамгаалагдсан. Designed By TomAmjilt