ХАГАЛГАА АМЖИЛТТАЙ БОЛЖ ЭХНИЙ ХҮҮХДҮҮД НУТАГ БУЦАХ ГЭЖ БАЙНА

Бээжин /МОНЦАМЭ.10.31/.БНХАУ-ын Улаан Загалмайн нийгэмлэг, МУЗН-тэй хамтран төрөлхийн зүрхний гажигтай, Монголд эмчлүүлэх боломжгүй 100 хүүхдийг БНХАУ-д үнэ төлбөргүй эмчлэх төсөл хэрэгжиж байгаа билээ. Төслийн хүрээнд энэ сарын 21-ний өдөр 41-н хүүхэд Бээжинд эмчлүүлэхээр ирсэн талаар урд өмнө сурвалжилсан билээ.
Тэдний эмчилгээний явц болон нөхцөл байдлын талаар тодруулахаар МОНЦАМЭ-агентлагийн Бээжин дэх сурвалжлагч газар дээр нь очиж уулзав.
Одоогийн байдлаар хүүхдүүдийн талаас илүү хувь нь хагалгаанд амжилттай орж, эрүүл саруул болоод, эхнээсээ нутаг буцаж эхлээд байна. Хагалгаанд ямар нэгэн эрсдэл гараагүй, бүх хүүхдийн биеийн байдал сайн, үлдсэн хүүхдүүд энэ долоо хоногт багтаж мэс ажилбарт орох юм.
Хүүхдүүд ирсэн даруйдаа эмнэлэгт хэвтэж, хагалгааны өмнөх шатны шаардлагатай эмчилгээ хийлгэж, өвчний онцлог, биеийн байдлаас хамаарч хагалгааны өмнөх эмчилгээний хугацаа харилцан адилгүй байна.Мөн хагалгааны дараах эмчилгээ, шаардлагатай эм зэргийг төслийн хүрээнд үнэ төлбөргүйгээр тэдэнд олгож байна. Эдгээр хүүхдүүд эх орондоо очоод Шастины нэрэмжит 3 дугаар эмнэлэг болон Эх нялхсын үндэсний төвд хяналтанд орох юм байна.
МУЗН-ээс энэхүү төслийн зохион байгуулалт болон орчуулгыг хариуцаж буй ажилтан н.Номингоо “Хүүхдүүд маань БНХАУ-ын зүрхний эмчилгээгээр дагнасан нэр хүнд бүхий Ан Жөн, Хуа Син эмнэлэгт эмчлүүлж байгаа. Өнөөдрийн байдлаар 21-н хүүхэд хагалгаанд амжилттай ороод байна. Хүүхдүүд маань маргаашнаас эхлээд нутаг буцах гэж байна. Маргааш 8 хүүхэд буцна. Гурван хүүхэд судсан дотуур хагалгаанд амжилттай ороод буцаж байгаа бол үлдсэн таван хүүхэд яг одоо хагалгаа хийх боломжгүй, тодорхой хэмжээний эмчилгээ хийлгээд, шинжилгээ өгч байж, хагалгаанд орох шаардлагатай болсон” гэв.

Шастины нэрэмжит 3 дугаар эмнэлэгийн эмч н.Булганаас хүүхдүүдийн эмчилгээний явцын талаар тодруулахад “Хагалгаанд ямар нэгэн эрсдэл хүндрэл гараагүй 100 хувийн үр дүнтэй бүгд, амжилттай болж байна.Өөрөөр хэлбэл тэдний маань зүрхний эмгэг бүрэн засагдаж, цоо эрүүл хүн болсон гэсэн үг. Энд хагалгаа хийлгэлгүй буцаж байгаа таван хүүхэд байна. Эдгээр хүүхдүүд маань хавсарсан гажигтай. Тэдний хувьд яг одоо хагалгаа хийх тохиромжтой цаг нь биш. Энэ хүүхдүүдийн хувьд эхлээд хавсарсан өвчнийг нь эмчилж байж зүрхний хагалгаанд оруулах шаардлагатай, нэг удаагийн хагалгаагаар бүрэн эдгэх боломжгүй, яг одоо хагалгааны эрсдэл өндөртэй, хагалгаа хийлгэх шаардлагагүй хэсэг хугацаанд эмийн эмчилгээ хийх шаардлагатай, жин багатай, хагалгааны зарим шаардлагыг бүрэн хангахгүй байгаа зэрэг шалтгаанууд байна. Тиймээс Хятадын эмч нар ярьж байгаад эмэн эмчилгээ хийж байгаад дараагийн үзлэгээр хагалгааны асуудлыг ярьж шийдэх байр суурьтай байгаа. Манай нэг эмч эхний ээлжний хүүхдүүдээ хянаад маргааш хамт буцах гэж байна. Дараагийн ээлжний эмч нь үлдсэн хүүхдүүдээ аваад хамт буцах юм. Хагалгааны дараах хяналтыг 3 дугаар эмнэлэг, Эх нялхсын үндэсний төвд хийнэ. Гурван сараас нэг жилийн хугацаанд хянах шаардлагатай байдаг” гэлээ.
Хүүхдүүдийн эцэг эх, ар гэрийнхэн энэ төслийг хэрэгжүүлж буй Хятад Улын Улаан загалмайн нийгэмлэг, МУЗН, Шастины нэрэмжит 3 дугаар эмнэлгийн хамт олон болон энэхүү сайхан буянтай ажлыг хэрэгжихэд тусалж дэмжиж буй бүхий л хүмүүстээ хязгааргүй их талархаж байгаагаа нулимс цийлэгнүүлэн чин сэтгэлээсээ илэрхийлж байсан.

Хөдөө орон нутгаас эмчлүүлж буй хүүхдүүдийн эцэг эхчүүд орон нутагт эмнэлгийн техник, тоног төхөөрөмж тааруу, эмч нарын мэргэжлийн ур чадвар хангалттай бус байдаг болохоор өвчнийг эрт илрүүлж чадахгүй хугацаа алддаг, заавал хотод ирж хяналтад орж, шинжилгээ өгдөг зэрэг хүндрэлийг хэлж байлаа.
Налайх дүүргээс ирсэн охин н.Номинжингийн ээж н.Лутаасүрэн “Миний охин 4-н настай. Дауны хам шинжтэй, зүрх нь цоорхой гэсэн оноштой. Эх нялхсын үндэсний төвийн хяналтад байдаг. Энэ хагалгааг Монголд хийх боломжгүй. Гадаадад хийлгэе гэхээр бидэнд санхүүгийн боломж байхгүй. Гуравдугаар эмнэлэгт Хятадын эмч нар ирж шинжилгээ хийж буйг сонсоод охиноо үзүүлсэн. Тэгээд энд дурангийн хагалгаанд орж амжилттай болсон, үнэхээр азтай. Бид маргааш буцна. 3 дугаар эмнэлэгт хяналтанд орно. Монголын 100 хүүхдийг эмчлээд, эрүүл саруул болгож өглөө ш дээ. БНХАУ-ын талаас биднийг маш сайхан хүлээж авч байна. Бүгдэнд нь маш их баярлалаа, цаашдаа Монголын энэ олон сайхан үрсийг эрүүл саруул болгож өгөөсэй гэж хүсч байна”.

access_time 2017-11-02 16:48

Холбоотой мэдээ

АНХААРУУЛГА: Уншигчдын бичсэн сэтгэгдэлд mgltimes.com хариуцлага хүлээхгүй болно. mgltimes.mn сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Хаяг : Улаанбаатар хот, Чингэлтэй дүүрэг 3-р хороо Peace tower 17 давхарт 1704 тоот
И-мэйл : MGLTimes976@gmail.com
Утас : +976 7500-8811
Ⓒ Бүх эрх хуулиар хамгаалагдсан. Designed By TomAmjilt