Отгонтэнгэр ууланд авиралт хийж байсан 27 уулчны 17 нь амь эрсэдсэн харамсалтай явдал тохиогоод байгаа юм. Сүүлийн хүний цогцсыг өнөөдөр өглөөний 10 цагийн орчимд олсон тухай Онцгой байдлын ерөнхий газраас мэдээлсэн. Эсэн мэнд бууж ирсэн 10 уулчны эсэн мэнд үлдсэн шалтгааны тухай мэдээлэл сошиал орчинд тавигджээ.

Тухайлбал, уулчид гурван олсонд хуваагдаж явсан байна. Эсэн мэнд ирсэн 10 уулчин нэг олсонд явсан бол 17 хүн хоёр олсонд хуваагдаж өмнө нь явсан аж. Цасан нуранги үүсэх хүчтэй дуу чимээ сонсогдож урд явсан хүмүүс нь алга болонгуут хойно яваа 10 хүн түр зогсч юу болоод байгааг ухаарах сөхөөгүй шоконд орсон байна.

Тухайн үед харанхуй болсон болохоор уулчид маш болгоомжтой бууж, хурдан хугацаанд тусламж дуудахыг зорьсон байна. Улмаар нэгэн айлтай таарч гэрийн эзэгтэйтэйнх нь гар утсаар нь Улаанбаатар руу яаралтай холбоо барьжээ. Тэгээд гурван хүн нь буцан явж бусдыгаа хайх оролдлого хийсэн байна. Уулчид утсаар ярихдаа “Цасан нурангид дарагдсан хүмүүсийн гэр лүү хурдан очоорой. Дэргэд нь байгаарай. Биднийг хот руу буцаж буй нисдэг тэргэнд суулгах зай байгаа, суугаад яв гэж байна. Бид эндээс түрүүлээд явахгүй.

Цасанд хучигдсан найзуудыгаа эхлээд эндээс явуулчхаад араас нь гэртээ харина” гэж ярьсан мэдээлэл байгаа юм. Цахим сайтуудад байгаа мэдээллээр 10 хүн эсэн мэнд үлдсэний шалтгаан нь тэднийг ахалж урд нь явсан хүн зургийн аппаратаа цааш нь далд хийх гээд 30 секунд орчим саатсантай холбоотой гэнэ. Энэ хооронд цас цөмөрч өмнө нь явсан 17 хүн ангал руу унасан байна. Авирагчид уулын уруу буухдаа гурван олсонд хүнд, хөнгөн жингээ тэнцүүлж хуваагджээ. Хэрвээ 30 секунд зогсоогүй бол бүгд л хавцал руу унаж эрсдэх магадлалтай байжээ. Эрлийн ажиллагаанд 200 гаруй алба хаагч, 30 гаруй техник хэрэгсэлтэйгээр ажилласан байна. Талийгаачдын ар гэр, найз нөхдөд гүн эмгэнэл илэрхийлье. Ум сайн амгалан болтугай.