“Хувьсал” продакшнаас уран бүтээлийн гараагаа эхэлж, Улсын драмын эрдмийн театр хэмээх их айлын нэгэн гишүүн болтлоо дэвжиж, өөрийгөө хэр сайн жүжигчин бэ гэдгээ батлан харуулсан гэж хэлж болох жүжигчин бол яахын аргагүй СТА Г.Отгонцэцэг юм.АНУ-ыг зорьж, харь оронд амаржсанаасаа хойш чимээгүйхэн амьдарч байгаа бүсгүйн хүүхдийн аавыг сонирхох хүн олон байсан. Энэ талаар ам нээхийг хүсдэггүй жүжигчин бүсгүй харин жүжигчин Б.Одбаяртай авахуулсан зургаа нийтэлснээр хүмүүсийн асуултын хариуг жинтэйхэн өгөв үү гэлтэй байв.

Дашрамд сонирхуулахад эсрэг дүрийг бүтээхдээ тунчиг чадварлаг тэрээр тэс өөр ертөнцийг бий болгож, өөрийгөө ямар ч дүрийг амилуулж чадна гэдгээ “6 дахь хүсэл” нэртэй киногоороо батлан харуулжээ.

“Орхидос” киноны Хойд эхийн дүрээсээ болж хэсэгтээ олны хэл амны бай болж явсан Г.Отгонцэцэг дүрээсээ болж өөрөө ч хэсэгтээ сэтгэлийн дарамтад орж хэцүү байснаа нуудаггүй. Овжин, зальтай, сээтгэнүүр дүрээр уншигчид маань түүнийг андахгүй ч энэ удаа та түүнээс найзынхаа төлөө юу ч хийхэд бэлэн байгаа эмэгтэйн дүрийг олж хардаг гэнэ.