Саяхан л ардын сургуулийн алтан босгыг алхаж “сурагч” хэмээх эрхэм алдар хүртэн хөөрөн баярлаж явсан бяцхан охин өдгөө эмнэлгийн орон дээр хорт хавдар гээч аймшигт өвчинтэй тэмцэлдэн, үхэл сэхлийн заагт хэвтэж буй талаар мэдээлэх гэж байна.

Зургаахан настай дэгж дэрвэж явсан хөөрхөн охин савны хорт хавдар гэх аймшигт өвчин туссан талаар сонсоод сэтгүүлч би үнэхээр хэлэх үг олдохгүй, хөөрхий охиныг өрөвдөж, энэлэн шаналж байгаа эцэг эхэд нь бага ч гэсэн сэтгэлийн дэм өгөх юмсан гэсэн чин хүсэл тээсэн юм.
С.Цэлмэг охины аав, ээж амьдралынх нь утга учир, гэрэл гэгээ болсон ганц үрд минь амьдрал бэлэглэж, элэг бүтэн амьдралыг нь аврахыг чин сэтгэлээсээ гуйн, ард түмнээсээ тусламж хүсч байна. Охины аав Э.Сүхбадрахтай ярилцсанаа та бүхэнд хүргье.

-ХАГАЛГААРААР БАРУУН ӨНДГӨВЧ, САВНЫ 70 ХУВИЙГ НЬ ТАЙРЧ АВСАН-

-Охиноо ийм өвчтэй гэдгийг хэзээ мэдсэн бэ?

-Есдүгээр сарын 16-нд би хөдөө ажилтай явж байгаад шөнө гэртээ орсон. Өглөө сэрсэн чинь охин маань уйлчихсан хэвтэж байсан. Яав ийв гэтэл “Аав аа, миний хэвлийгээр өвдөөд байна” гэсэн. Яасан юм бол гээд ээж нь намайг “Охиноо аваачаад эмнэлэгт үзүүлчих. Дээрээс хойш энд юм өвдөж байна гээд байгаа юм” гэсэн. Эмэгтэй хүүхэд болохоор доороосоо даараад байгаа юм болов уу гээд дулаан хувцаслаад л яваад байсан. Ийм айхтар хавдар тусчихсан гэж төсөөлөө ч үгүй байсан. Ингээд охиноо Эх нялхаст аваачиж үзүүлсэн.

-Эход үзүүлээд л хавдар гэдгийг шууд оношилсон уу?

-Эмч нь ямар ч байсан олгой биш байна. Эход харуулчих гэсэн. Эход харуултал “Өндгөвчний тэр хавьцаа их том хэмжээтэй юм байна. 6×4 хэмжээтэй юм байна гэсэн. Тэгээд буцаад хагалгааны эмч дээр очоод үзүүлсэн. Баруун өндгөвчинд нь уйланхай шиг юм байна. Тодорхой мэдэхийн тулд томографикт харуулах хэрэгтэй гэсэн. Томографикт харуулчихаад ирэхэд эмч нар зургийг нь хараад баруун өндгөвч нь хавдартай байна, хагалгаа хийхгүй бол цаашаа улам үрэвсэж тархаж магадгүй гэсэн. Ингээд хагалгааны эмч нар ярилцаж байгаад дурангаар хагалгаа хийхээр болсон доо. Тархаагүй байхад нь яаралтай авчихвал зүгээр гэж хэлсэн.

-Хагалгаанд хэзээ орсон бэ?

-Есдүгээр сарын 21-ний өдөр 14 цагт хагалгаанд орсон. Орой 4, 5 өнгөрч байхад эмч нь С.Цэлмэгийн ээж, аав нь байна уу гэж дуудуулсан. Яарч сандраад ортол хавдар нь сав руугаа ороод, савныхаа ард тал руу үсэрхийлчихсэн байна. Тиймээс охины чинь баруун өндгөвч, савыг нь авах хэрэгтэй гэж хэлсэн. Бид хоёр яахаа мэдэхгүй маш их айж балмагдсан. Тэгээд Эх нялхасын төрөх тасгаас бүр том эмч дуудаад зөвлөлдсөн. Дурангийн хагалгаагаа болиод шууд нээлт хийж хагалгаанд оруулж байж хавдрыг цэвэрлэхээр болсон. Ингээд баруун өндгөвч, савны 70 орчим хувийг нь тайрч авснаар хагалгаа орой долоон цаг өнгөрч байхад дууссан.

-ИРЭЭДҮЙД ХАРАМСАХГҮЙН ТӨЛӨӨ ЧАДАХ БҮХНЭЭ ХИЙХЭЭР ШИЙДСЭН-
-Хагалгааны дараагаас л шууд химийн тариа хийлгэж эхэлсэн гэсэн үү?

-Хагалгаанаас гарснаас хойш хоёр, гурав хоносны дараа эдийн шинжилгээний хариу ирсэн. Гэтэл маш ноцтой хариу гарсан. Эмч нь “Та хоёр өөрсдөө маш сайн гүйж, гадаадад эмчлүүлэх арга байдаг эсэхийг хөөцөлдөхгүй бол Монголд эмчлэгдэх аргагүй болсон байна гэж хэлсэн. Хавдар тархсан хэсгийг нь авсан ч гэсэн цаана нь үсэрхийлчихсэн үлдэц нь үлдчихдэг юм байна. Ингээд миний охин есдүгээр сарын 28-наас хойш Эх нялхасын хавдарын тасагт хэвтэж байна. Аравдугаар сарын 2-ноос хойш химийн тариа хийж эхэлсэн. Тариа хийлгэж эхэлсэнээс хойш охин маань ус ч ууж чадахгүй болчихоод байгаа.

-Эдийн шинжилгээний хариу нь яг юу гэж гарсан бэ?

-OVARY:Yolk sac tumor with tumor necrosis буюу өндгөвчний хорт хавдар болох нь тогтоогдсон гэж хариу гарсан. Энэ нь бусад эд эрхтэнд үсэрхийлэх, цаашилбал амь насанд нь аюултай болохыг мэдсэн юм. Химийн тариа хийхгүй л бол маш хурдан тархаж, амиа алдах магадлалтай юм билээ.

-Одоо биеийн байдал нь хэр байна вэ?

-Хэвтэрийн хүн болсон гэх үү дээ. Жаахан ус уухаар дотор нь муухайраад, бөөлжөөд гаргачихаад байгаа. Миний охин энэ намар хичээлд ороод дөнгөж арван хэдхэн хоног явж байсан юм.

-Гадагшаа яваад эмчлэгдэх боломж байхыг үгүйсгэхгүй шүү дээ. Гадаадын эмнэлгүүдэд хандсан уу?

-Бид хоёр ирээдүйд харамсахгүйн тулд охиныхоо төлөө чадах бүхнээ хийхээр шийдсэн. Тиймээс гадагшаа дотогшоо явуулж эмчлүүлэх арга боломж юу байна бүгдийг судалж эхэлсэн. Энэхүү өвчнийг цаашид Монголдоо эмчлэх боломжгүй учир бид яаралтай хилийн чанадад очиж эмчлүүлэх хэрэгтэй. Бид одоогоор Франц, Герман, БНСУ, БНХАУ-ын эмнэлгүүдэд хандсан байгаа. Гэвч одоогоор аль ч эмнэлгээс нь хариу ирээгүй байна. Миний охиныг эмчилж чадах эмнэлэг байгаа гэдэгт итгэж байгаа. Мэдээж нааштай хариу ирвэл эмчилгээний зардал мөнгө нь хэдэн саяар тоологдохыг хэлж мэдэхгүй. Миний охин цаг алдалгүй эмчилгээнд орох шаардлагатай байгаа. Охины минь амьдралд цаг хором бүр үнэтэй байгаа учир та бүхнээсээ сэтгэлийн өглөг хандив гуйж байгаа юм шүү.

-ОХИН МИНЬ ЭЭЖ ХҮН БОЛОХ БОЛОМЖГҮЙ БОЛСОН-
-Савных нь 70 хувийг, баруун өндгөвчийг нь авчихсан. Харамсалтай юм?

-Хавдар нь үсэрхийлчихсэн болохоор яалт ч үгүй тайрах шаардлагатай байсан гэж хэлсэн. Савных нь бага ч гэсэн хэсэг үлдсэн болохоор эмчилгээ хийлгээд эдгэрсэн тохиолдолд эмэгтэй хүний гормон нь байгаад биений юм нь цаашид ирэх боломжтой гэж эмч нар ярьж байсан. Харин хэзээ ч хүүхэдтэй болох боломжгүй болсон доо. Уг нь анх хагалгаанд орохоос өмнө баруун өндгөвчийг авлаа гэхэд хүүхэдтэй болох магадлал 50 хувь болох байх гэж ярьж байсан. Гэтэл хагалгааны явцад хавдар үсэрхийлсэн байсан учраас савных нь 70 хувийг авчихсан. Савыг нь бүрмөсөн юу ч үгүй авчихаар эмэгтэй хүний ямар ч гормон ялгарахгүй, нэг ёсондоо эмэгтэй хүн байхаа больдог гэж байсан.

-Өмнө нь бага насны хүүхэд өндгөвчний хорт хавдар тусч байсан тохиолдол байдаг юм болов уу. Эмч нараас асуусан уу?

-Өмнө нь ийм тохиолдол гарч байгаагүй гэсэн. Анх удаа бага насны хүүхэд ийм хорт хавдраар өвчилж байгаа болохоор яаж эмчлэхээ эмч нар сайн мэдэхгүй л байгаа юм шиг байна. Эмч нарын ярьж байгаагаар өмнө нь Монголд 17-той эрэгтэй хүүхэд ийм төрлийн хорт хавдар тусч байсан гэсэн. Тэр хүүхэд хорт хавдартайгаа мэдэхгүй олон жил болчихсон, нярай хүүхдийн толгой шиг том хавдар үүсчихсэн байсан гэж ярьж байсан. Тухайн хүүхэд амиа алдсан юм билээ.

-Яг юунаас болж ийм хавдар үүссэнийг тогтоох боломж байдаггүй юм болов уу?

-Эмч нарын хэлж байгаагаар бүр эхийн хэвлийд байхад нь сав нь үүсэхэд хамт үүссэн уйланхай байж магадгүй гэж хэлсэн. Төрөлхийн гэсэн үг. Хавдар үүсэх шалтгааны 95 хувь нь тодорхойгүй, зөвхөн таван хувь нь удамшлынх байдаг гэдэг юм байна.

-Охиныхоо төлөө чадах бүхнээ хийгээрэй.
-Тэгнээ. Баярлалаа.

Та бүхэн С.Цэлмэг охины аав ээжтэй холбогдож, тэдэнд сэтгэлийн хандив өргөхийг хүсвэл доорхи утсаар холбогдох боломжтой юм шүү.

Аав: Энхбаатарын Сүхбадрах (99643562)
Ээж: Насаннэмэхийн Бямбамаа (95643562)
Охин: Сүхбадрахын Цэлмэг Хандивын данс: Хаан банк 5020912097 Энхбаатарын Сүхбадрах