2018-09-21 15:46

Таныг залуужуулах эртний Төвд дасгал

access_time 2018-09-21 15:46

Орчин цагт хүний биеийг тураах, залуужуулах дасгал, дэглэм хэт олширч хүмүүсийг төөрөгдүүлэх болсон. Энэ үүднээс та бүхэнд “Төвдийн залуужуулах 5 дасгал”-ыг толилуулж байна. Энэхүү дасгалыг энергийн нүх сүв буюу чакраг нээдэг гэдэг бөгөөд эхний дасгал нь нээгээд дараагийн дасгалууд нь идэвхжүүлж өгдөг юм. Энэ дасгалыг хийснээрээ хөдөлгөөний дутагдлаас салж, нурууны муруйлтаас сэргийлэх, нугалам хоорондынхоо зайг хадгалах, уян хатан чанараа сайжруулах, бүх булчингуудаа суллаж, стрессээ тайлах давуу талтай ажээ. Мөн эдгээр дасгалыг тогтмол хийснээр бие маш сайн амарч, өдөржин эрч хүчтэй ажиллах боломжийг бүрдүүлж өгдөг гэнэ. Дасгал хийхийн өмнө юм идэж болохгүй, нүүр гараа угааж цэвэрлэсэн байна.

Таныг залуужуулах эртний Төвд дасгал

Таван дасгал тус бүрийг 21 удаа хийдэг ба үүнээс их хийхэд сөрөг үр дагавар гарахгүй ч илүү үр дүнд хүрнэ гэж үгүй. Энэ дасгалыг яг л 21 удаа хийвэл тохирно гэсэн үг. Шинээр эхлэгсэд шууд 21 удаа хийхэд хэцүү тул сэтгэлээр уналгүй сайн хичээх хэрэгтэй. Бараг нэг сарын турш хийж байж амархан хийдэг болно. Эс бөгөөс 9-12 удаагаас эхлэн өөртөө тааруулаад тоогоо нэмээд байж болох юм. Дасгалыг өглөө, орой хэзээ ч хийж болно.

1 Нэгдүгээр дасгал

Цэх зогсоод зурган дээрх шиг гараа алдал. Алга доош харсан, дэлгээстэй, хуруунууд хамтдаа. Гарынхаа байрлалыг өөрчлөлгүйгээр цагийн зүүний дагуу биеэрээ бүтэн эргэлт хий (баруун тийш). Завсарлагагүйгээр 21 удаа эргээрэй. Дуусгаад хөлөө нийлүүлэн цэх зогсоод, гараа ташаан дээрээ авна. Амьсгалаа хамраараа гүнзгий авч, уруулаа “О” үсэг болгоод амаараа амьсгалаа гаргаарай.

Дараагийн дасгалд шилжтэл хоёр удаа ийм байдлаар амьсгал авч гаргаарай (энэ нь дасгал болгоны дунд хийгдэх ёстой). Та энэхүү дасгалыг анх удаа хийж байгаа бол толгой тань эргэж магадгүй. Тиймээс унахаас болгоомжлоорой. Энэ дасгал нь тэнцвэрийн тогтолцоог сайжруулдаг. Дасгалаа тогтмол хийснээр толгой эргэхээ больж, маш хурдан хийсэн ч төвөггүй хийдэг болно.

Нэгдүгээр дасгал

2 Хоёрдугаар дасгал

Хивс юм уу гудсан дээр дээш харан хэвтнэ үү. Хөлөө жийн шагайгаар нь нийлүүлнэ. Гарын алгануудаа доош харуулаад биеийнхээ дагуу байрлуулна. Хамраараа амьсгал авангаа хөлөө 90 градусаас ялимгүй их өнцгөөр дээш өргөнө. Үүнтэй зэрэг эрүүгээ цээжиндээ хүртэл нь толгойгоо өргөнө. Аядуухан зөөлөн хөдлөөрэй. Хэвтэж байхад хөлийн хурууд ээтийсэн, бүсэлхий газраас хөндийрөхгүй байх хэрэгтэй. Толгой хөлөө газар буулгахдаа амьсгалаа ам юм уу, хамраараа гаргаарай. Биеэ бүрэн сулла. Хөл толгойгоо өргөхдөө амьсгалаа аваад буулгахдаа гаргаад тасралтгүй нийт 21 удаа хийнэ. Дасгалаа дуусгаад босч, хөлөө нийлүүлэн зогсоод, гараа ташаан дээрээ авна. Хоёр удаа гүнзгий амьсгал авч гаргаарай. Амьсгал авахдаа хамраараа, гаргахдаа уруулаа “О” үсэг үүсгэн амаараа гаргаарай.

Хоёрдугаар дасгал

3 Гуравдугаар дасгал

Хөлийн хуруунуудын өндгүүдээрээ газар тулан өвдөг дээрээ зогс. Өвдөг хоорондын зай 10-11 см байх ёстой. Хоёр гар өгзөгний дор. Нуруу цэх, эрүү цээжинд. Хамраараа амьсгалаа аваад бүсэлхийгээрээ нумран гэдий. Толгойгоо аль болох хойш гэдийлгээрэй. Хойш гэдийхэд өгзөг гаранд тулгуур болно. Ам юм уу, хамраараа амьсгалаа гаргаж эхний байрлалдаа очно. Нэгэн хэмээр 21 удаа тасралтгүй хийгээрэй. Дуусгаад босч, хөлөө нийлүүлэн зогсоод, гараа ташаан дээрээ авна. Хоёр удаа гүнзгий амьсгал авч гаргаарай. Амьсгал авахдаа хамраараа, гаргахдаа уруулаа “О” үсэг үүсгэн амаараа гаргаарай.

Гуравдугаар дасгал

4 Дөрөвдүгээр дасгал

Хөлөө урагш жийн суугаад алгаараа өгзөгний харалдаа газар тул. Гарын байрлал маш чухал бөгөөд алгаа биеийн дагуу чиглүүлсэн байх хэрэгтэй. Эрүү цээжинд авна. Хамраараа амьсгал авангаа өгзгөө дээш өргөн өвдгөөрөө нугарна. Толгойгоо хойш нь бүрэн гэдийлгэ. Гар хөл газарт перпендикуляр, их бие газарт параллел байна. Эхний байрлалд буцаж орохдоо ам юм уу хамраараа амьсгалаа гаргаарай. Уг дасгалыг 21 удаа нэг хэмээр тасралтгүй хийнэ. Хөл гулгахгүй байх нь чухал. Хөлийн ул дасгал дуустал нэг байрлалдаа байна. Гар нугарахгүй ба зөвхөн мөрөөрөө хөдөлнө. Дуусгаад босч, хөлөө нийлүүлэн зогсоод, гараа ташаан дээрээ авна. Хоёр удаа гүнзгий амьсгал авч гаргаарай. Амьсгал авахдаа хамраараа, гаргахдаа уруулаа “О” үсэг үүсгэн амаараа гаргаарай.

Дөрөвдүгээр дасгал

5 Тавдугаар дасгал

Эхний байрлал – тулах цэг гарын алга, хөлийн хуруудын өндөгнүүд. Хөл гарын хоорон дахь зай 60-70см. Толгой дээш гэдийсэн байдалтай. Гар хөлөө нугалалгүйгээр амьсгал авангаа өгзгөө дээш өргөн эрүүгээ цээжиндээ хүргэ. Таны бие адил талт гурвалжин үүсгэнэ. Ам юм уу хамраараа амьсгалаа гаргаад эхний байрлалдаа орно. Газартай зөвхөн алга болон хөлийн хурууны өндгөөрөө хүрэлцэнэ. Дасгалыг 21 удаа тогтмол хэмнэлээр хийгээрэй. Дуусгаад босч, хөлөө нийлүүлэн зогсоод, гараа ташаан дээрээ авна. Хоёр удаа гүнзгий амьсгал авч гаргаарай. Амьсгал авахдаа хамраараа, гаргахдаа уруулаа “О” үсэг үүсгэн амаараа гаргаарай.

АНХААРУУЛГА: Уншигчдын бичсэн сэтгэгдэлд mgltimes.com хариуцлага хүлээхгүй болно. mgltimes.mn сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.